Haqqımızda

Kollecin yaranması Azərbaycan Xalq Cümhuriyyəti hökumətinin ilk illərindəki ölkədə orta ixtisas təhsilinin bərpası milli müəllim kadrlarının hazırlanması ilə başladı. Ümumtəhsil məktəblərinin sürətlə artması şagird sayının çoxalması Azərbaycan dilində dərs deməyi bacaran müəllimlərə böyük ehtiyac yaratdı.

Bu məqsədlə Bakı Kişi Müəllimlər Seminariyası açıldı və ona Rəşid bəy Əfəndiyev rəhbərlik etdi. Sonradan seminariyanın rəhbərliyinə Pənah Qasımov təyin olundu. O, Hüseyn Cavid, Abdulla Şaiq, Soltan Məcid Qənizadə, Üzeyir bəy Hacıbəyli və Müslüm Maqomayev kimi dövrün tanınmış ziyalılarını tədrisə cəlb etdi.

Qısa zamanda məktəbdə ciddi nizam-intizam və yüksək tədris səviyyəsi formalaşdı, nüfuzu qonşu respublikalara qədər yayıldı. Tələbələrin biliyini qiymətləndirən komissiya yalnız 40 nəfəri təhsilə davam etməyə layiq gördü. Onlardan 9 nəfər 1922/23-cü ildə ilk məzunlar oldu və ölkənin müxtəlif bölgələrinə müəllim kimi göndərildi.

1920-ci ildə Bakıda Darülmüəllimat – qadın müəllim seminariyası yaradıldı. Müdir Mədinə xanım Qiyasbəyli, tədris hissə müdiri isə Gövhər xanım Qayıbova idi. Burada Hüseyn Cavid, Üzeyir Hacıbəyli, Abdulla Şaiq və digər tanınmış müəllimlər dərs deyirdilər. 120 qızın ana dilində təhsil alması Azərbaycan qadınının həyatında mühüm hadisə oldu.

1925-ci ildə bu məktəbin ilk buraxılışında 16, 1926-cı ildə isə 40 qız müəllimlik vəsiqəsi aldı. Burada təhsil almış Mirvarid Dilbazi, Şəfiqə Qiyasbəyli, Ümidə Qafarzadə kimi qadınlar maarif və mədəniyyət sahəsində böyük xidmətlər göstərdilər.

1926-cı ildə iki seminariya birləşdirilərək Bakı Müttəhid Pedaqoji Texnikumu adlandırıldı. 1927-ci ildə birləşmiş məktəbin ilk buraxılışı keçirildi — 105 nəfər məzun müxtəlif bölgələrdə fəaliyyətə başladı. Bu təhsil ocaqları Azərbaycan maarifçiliyinin və milli pedaqoji kadr hazırlığının formalaşmasında mühüm rol oynadı.